ခိုင်မာသော အာမခံချက်များရရှိမည်ဆိုပါက တန်ဖိုးနည်းအိမ်ရာများအတွက် နှစ်ရှည်ချေးငွေ ထုတ်ပေး မည့်လုပ်ငန်းများကို အမေရိကန်ဘဏ်အချို့က လုပ်ကိုင်လိုနေကြောင်း မြန်မာနိုင်ငံကုန်သည်များနှင့် စက်မှု လုပ်ငန်းရှင်များအသင်းချုပ်မှ သတင်းရရှိသည်။
“ အမေရိကန်မှာ တွေ့စဉ်က မြန်မာပြည်မှာ ချေးငွေပေးဖို့ ဒေါ်လာ ၂ ဘီလီယံလောက် သီးသန့်ဖယ်ထား တယ်လို့ ဘဏ်တစ်ခုက ပြောဖူးတယ်” ဟု ကုန်သည်စက်မှုအသင်းချုပ်မှ ဒုတိယဥက္ကဌတစ်ဦးက ဆိုသည်။
အဆိုပါဘဏ်သည် အစိုးရ၀န်ထမ်းများအား တန်ဖိုးနည်းအိမ်ရာများ ၀ယ်ယူနိုင်ရန် နှစ် ၃၀ နှစ်ရှည်ချေးငွေ များပေးရန် စီစဉ်ထားသည်။
သို့သော် ယင်းကဲ့သို့ ချေးငွေများပေးရာတွင် မြန်မာနိုင်ငံအစိုးရအဖွဲ့၏ အသိအမှတ်ပြု အာမခံချက်များ၊ ဘဏ်ဖွင့်လှစ်ခွင့်များပေးရန်လိုအပ်ကြောင်း အထက်ပါပုဂ္ဂိုလ်က ပြောကြားသည်။
အမေရိကန်ပို့ကုန်၊ သွင်းကုန်ဘဏ်က မြန်မာနိုင်ငံသို့ ကုန်ပစ္စည်းများတင်ပို့ရာတွင် အမေရိကန်လုပ်ငန်းရှင် များအား ငွေထုတ်ချေးမည်ဟု ယခုရက်ပိုင်းတွင် ထုတ်ပြန်ခဲ့သည်။ ထို့အတူ ငွေကြေးလွှဲပြောင်းရာတွင်လည်း ၆ လ မှ ၁၂ လထိ ရေတို အာမခံပေးမည်ဟု ကြေညာချက်တွင် ပါဝင်သည်။
အမေရိကန်နိုင်ငံမှ လူသုံးကုန်များ၊ စိုက်ပျိုးရေးနှင့် သတ္ထုတွင်း တူးဖော်ရေးစက်ပစ္စည်းကရိယာများ တင်သွင်းရန် စီစဉ်နေကြောင်း ပြည်တွင်းလုပ်ငန်းရှင်များကပြောသည်။
မြန်မာနိုင်ငံအနေဖြင့် အပြောင်းအလဲများ ပေါ်ပေါက်လာပြီး အမေရိကန်နိုင်ငံ၏ စီးပွားရေးအရ ပိတ်ဆုိ့မှုများ လျှော့ပေါ့ခဲ့သော်လည်း ကုန်သွယ်ရေးကဏ္ဍမှာ ယနေ့အချိန်ထိ တိုးတက်လာခြင်းမရှိသေးပေ။ အမေရိကန်နိုင်ငံသို့ ယနေ့ချိန်ထိ မြန်မာပို့ကုန်များ တင်ပို့ရန် ဈေးကွက်ရှာသည့်လုပ်ငန်းများမှာ ရေထွက်ကုန်နှင့် လက်ခစား အထည်ချုပ်လုပ်ငန်းများသာ အများဆုံးဖြစ်ကြောင်း စီးပွားရေးလုပ်ငန်းရှင်များကဆိုသည်။
အမေရိကန်နှင့် မြန်မာ နှစ်နိုင်ငံ ကုန်သွယ်ရေးပမာဏမှာ ၂၀၁၂-၁၃ ဘဏ္ဍာနှစ်တွင် ကန်ဒေါ်လာ သန်း ၁၅၀ ကျော်သာရှိပြီး မြန်မာနိုင်ငံမှ ပို့ကုန်တန်ဖိုး သန်း ၃၀ ၀န်းကျင်သာရှိခဲ့သည်။
7 days New